غزلیاتی حیرت انگیز از شاعران اردبیل
(1)
اولدی کؤنلوم یئنه بیر زولف چلیپا دلیسی
دوشدی زنجیره نه خوش یئرده بو سودا دلیسی
عور و عریان باش آچیق اوز چؤووروب صحرایه
قویدی مجنونی یاری یولدا بو صحرا دلیسی
عاشق ســـوخته دیر بولبول شیدا کی دگیل
کی اولوبدور دیه سن بیر گول حمرا دلیسی
رب ارنی دئیلن ذیکری دؤنوب موسایه
دشت ایمن ده اولوب نور تجلی دلیسی
چوخلاری مست قیلیب ساقی میخانه عشق
گؤرمدی کیمسه منیم تک بئله رسوا دلیسی
دئمه فرهاد ایله مجنون دلی دیر بیر بری باخ
بیری شیرین دلیسیدر بیری لیلی دلیسی
کنج وحدتده تباه اولی عزیز عؤمروم حئییف
اولمادی یار منه بیر بت زیبا دلیسی
خوشلیب دیر گؤره سن هانسی مزارستانی
دیون اول زاهده ای بیر کوکه حلوا دلیسی
گول ایاغینده سحر وقتی ییخیلمیشدیم مست
بیری سسلندی کی ای بو گول رعنا دلیسی
بیر آییل گؤر کی نباتی نئجه اوراد ائله ر
نه یاتیبسان بئله ای بیر گؤز شهلا دلیسی
سید ابوالقاسم نباتی
(2)
اي مسلمانلار بوگون آشوفته حالم دوغروسي
درديمي اظهار ائدممم يوخسا لالم دوغروسي
بنزه رم بير بالتالانميش مسخ اولونموش پيكره
يا كي جنگل ايچره اود دوتموش نهالم دوغروسي
بير بوغولموش لوتكه يم طوفانلي دريا ايچره من
لحظه لحظه راهي قعر زوالم دوغروسي
اولدوز اولدوز آرزيلار كرتينده اوميد اكميشم
نيشخنديلن دئييرلر خوش خيالم دوغروسي
من كيمم يا هانسي اولدوزدان بوگون يوللانميشام
من يارانميشلار ايچينده بير سؤالم دوغروسي
گونده گونده چاتلاديبدير باغريمي غربت غمي
كيمسه سيزليك حلقه سينده بي مثالم دوغروسي
ايسته مم هئچ قارقيميش تورپاق يئتيشديرسين مني
بي ثمر دونيا باغيندا لاپدا كالم دوغروسي
اي بقا شعرين گويونده اويناماز روحوم قوشو
تا اسير درس و مشق و قيل و قالم دوغروسي
(3)
خالوندان اوچدو مرغ خیالیم لب اوستونه
قسمت چکیب گتیردی نه خوش مشرب اوستونه
کونلوم خیال زلف پریشان دان جمع ایدی
بیردن داغیلدی خال وخط وغبغب اوستونه
ائیله ر سپاه حسن روخون عالمی خراب
زولفون آچیلسا پرچمی بوموکب اوستونه
قاشوندی بو کی گوشه سی زلف اوزره میل ائدیب
یا ذوالفقار دیر اگیلیب مرحب اوستونه
بو سیمناب عذارووی سیماب تک عرق
بیر آیه بنزه دیر دوزوله کوکب اوستونه
اوج ائتدی چاه دن مه نخشب ولی چیخیب
چاه زنخ اوزون ده مه نخشب اوستونه
جولان ائدن ده هر طرفه جان شکار ائدیر
کیم دیر بوشهسوارچیخیب مرکب اوستونه
پیچیده اولما زولفونه چوخ بوسه دن دانیش
چوخ طول وئرمه بو سوزه کئچ مطلب اوستونه
توک سینه ام اوسته زولفووی زولفون چالیب منی
عقرب چالان یئریم قویولور عقرب اوستونه
جانان کی بیرجه بوسه سینه نقدجان اولور
لعلی بوجان دان ال گوتو قوی لب لب اوستونه
(4)
قانلــــی کیــرپیکلریمـــی ائیلــه میشـم شانه گؤزل
گل ووروم شانــــه او گیســوی پریشانــــه گـــؤزل
سوپوروب جان ائویمی سیلمیشم ای مــونس جان
گل کــــی قوربانــدی جانیم سن کیمی جانانه گؤزل
گل قدم قوی گؤزومـــه ، چونکــی سنین خاطیرینه
بزنیب قیرمیـــــزی مــرجانلا بو کـاشــانـــــه گؤزل
سئومــــه سن گؤزلریمی ، خلوت سینه مده اوتور
بـــو عمــــارتده نه یاد وار نه ده بیگانـــــــه گؤزل
مین کـــره یاندی پریــم شـووق ووصالینــدا سـنین
سن کیمی شمع هانی ، من کیمــی پروانه گؤزل ؟
اینتیظارین ائلـــــه دی ناظـــــر بیچـاره نـــــــی زار
گل داها یوخ دؤزوموم مؤحنت هیجرانــــه گـــؤزل
(5)
باتما ای، آی، بوردا بیر عاشیق پریشان دیر هله
گلمه ای آیدین سحر یار بیزده مهمان دیر هله
گل پریشانی، پریشان ائیله مه، احسان ائله
ای سخاوت کانی جان مشتاق احسان دیر هله
گل مریض عشقدن کسمه کرامت کولگه سین
اوز پرستاریم منه مشغول درمان دیر هله
دان یئرین، دان اولدوزون بیرده سنی گوزلر گوزوم
مورگولو گوز کیپریک اویناتماز نگهبان دیر هله
قوی غریبلر حلقه سینده منده بیر مجلس قوروم
سنده اول شاهد کی شام، شام غریبان دیر هله
باتما ای،آی، گل یوبان پوزما نیاز عالمرین
گلمه ای آیدین سحر یار بیزده مهماندیر هله
(6)
باشیم تک بیتدی آق توک لر قاشیم دان
گئنه دیوانه لیک چیخماز باشیم دان
اوتن گون اوز قولاغیم لن ائشیتدیم
آراز ائیلردی صحبت گوز یاشیم دان
سواوستونده حیاتیم نقش لنمیش
نصیبیم اوددو اما نقاشیم دان
گلر بیر گون اوزوم دن اوپمه ین لر
اوپرلر تورپاغیمدان یا داشیم دان
گونش دوشمزدی گوزدن گر اولایدی
ضیالی بیر گونوم آلتمیش یاشیم دان
یاوان آلچاقدی یا منت لی یاغ لی
جوابین تاپمیشام دن سیز آشیم دان
من ایلن غم ائکیز قارداش دی شاهی
شکایت ائتمه رم من قارداشیم دان
(7)
گه ل اورک ساغرینی حزن ایله دولدور حالا باخ
آجی خول دان آسیلی جان کیمی شیرین بالا باخ
ای الف قد دوشوب آردینجا اورک لر سورونور
گورمه ک ایسترسن اگر محشری دون بیر دالا باخ
دئدیم ای پیر ایکی دنیا اولو بیر نقطه یه جمع
دئدی شبهه ن وار اگر دلبر اوزونده خالا باخ
آتام ائیلردی سفارش می ونی دن چکین ام
زاهدین حرفی دی بو حرف / کال اوغلو کالا باخ
قوجا دنیا فئلی مغرور ائله میش شخصه دئین
رستمین تورپاغینی بو یئله وئرمیش زالا باخ
عاقبت دا ش دا دا تاثیر ائله دی شعرلریم
حجت ایسترسن اگر شیخ ائدن استقبالا باخ
هوس وحرص ایله شاهی ده دئدیم ال بیر اولوب
دئدی قوزقونلارا گاهی قوشولان قارتالا باخ
عسگرشاهی اردبیلی
(8)
ای جماعت بیر ملک گورکـم لی سیما گورموشم
درس آلین من ده ن کی من صورت ده معنا گورموشم
کیپریگ ایملن آچیمیشام بیر قاره زولفون حلقه سین
اوردا افلاطون گزه ن معنانی پیـــدا گورموشم
قانلی اشک ایلن یویوب پاک ائتمیشم بو گوزلری
باخمیشام زیبا اوزه جنات الاعلا گورموشم
کیم دئسه یوخ دان وار اولماز سویله ین ای بی خبر
من یوخو وار ائیله ین بیر چشم شهلا گورموشم
سورماین محشر سوزون علامه ده ن من ده ن سورون
من قیامت قالدیران بیر قد رعنا گورموشم
یئرده هوندور داغلاری حیران ائده ن بیر سرو قد
گوگ ده گون ده ن باج آلان بیر ماه سیما گورموشم
عارفه جان بخش ائده نده لطفی ای دل باخمیشام
عاشق این جانین آلان دا حسنی جانا گورموشم
کلمه کلمه لب لرین ده ن سوز آچان چاغلاردا من
شدده شدده گوهر ویاقوتی رسوا گورموشم
عشق اوخوایلان کیپریگ این نقش ائتمیشم جان لوحینه
غیب سرین نقش ده یا بیلمیشم یا گورموشم
اولماسا علم ایم ده دولغون تجربه ام وار (شاهیا
باش دا کی آغ توک لریم سویله ر کی دنیا گورمیشم
عسگرشاهی اردبیلی
(9)
قاشلارون قبله گاه اولور اولسون
اگری لر روبه راه اولور اولسون
زولفووه آشنا اولان گون ده ن
روزگاریم سیاه اولور اولسون
قتلینه صف چکیب او کیپریک لر
هربیری بیر سپاه اولور اولسون
حسنووون مین چیچک لی باغیندان
قسمتیم بیرجه آه اولور اولسون
فتنه جو ساچلارین وئریب فتنه
فضل ودانش گناه اولور اولسون
(شاهی )ام من ده نکته بین لر تک
شوکتیم اشک و آه اولور اولسون
ایندی کی شهریاریمیزگئتدی
هر گدا هاردا شاه اولور اولسون
عسگرشاهی اردبیلی
(10)
جز حدیث دل که با شاهی دهان جام گفت
هرچه گفت اهل دلیل ودرس ودانش خام گفت
می فریبند اهل ظاهر را به بوی باغ خلد
این حدیث معتبر را مرغکی در دام گفت
باچنین صنعت که زاهد می کند درلفظ ولحن
سنگ ها را می توان آئینه ی اسلام گفت
رشته ها شد مار ومن حبل المتین جویم هنوز
هر که گفت از عقل دارم بهره ای سرسام گفت
غنچه ها راکاین چنین اندر فلاخن می نهند
بدمبین گر سوسنی واعظ شد ودشنام گفت
روز رجعت باید از سوراخ سوزن بگذری
این سخن با ترمه پوشی درزی ایام گفت
هرچه گفتار است بر دیوار ودر کوبیدنی است
جز حدیث دل که با شاهی دهان جام گفت